Wokha Town Baptist Church History

WOKHA TOWN SOYING

British na oro e nyanchethüng jo ete Lotha jipo jiang ombo ombo yan lona vanta vansi, ete nzontsü longchüng nliv rocho. Motsü eran jiang ephanina, 1875 June chorolo Naga meta sataronta longchüng Samuguting jilo na eseni Lotha metalo hansi oyi Wokha station ji soyingcho. Hojithüng British na oro meta tsso jijo Wokha yan ratsso Tsümang Wozhu (enhunga Tsümang yankho shi).

Hojithüng yansasae Capt. Johnstone tona Lieut. Terna to oni na ekhyimphi ovo nzoa (100) sosi oro Wokha lona Naga osi Lotha meta jiang sataronta elhi jiang benkai tssocho to khachetala. Enhünga ete na vanta evamo Wokha Town shijo Wokha tona Longsa yan ratsso lo tssoe ete Lotha jipo okying ji khicho. Hojito Sorkari elhi etssoe ephalo, kyon ekyimphae vanta yicho. Sulami jo Christain ha jüra oyi vancho, hojito etsowo ji tsükona Christain jiang na nzotssoe randan khümshum ha 1919 lona benkae khita yicho.

WOKHA TOWN BAPTIST CHURCH MOTSU

1913 lo Chichamo Ovung, Pyangsa yamo ji na Wokha mozhüki elhi tssolo yicho. Shi yutalo Wokha Station lo Khristian ha vamracho tolia okho soyingi khümshüm elhi jo nliv vancho, hoji tsükona ombona Khriatian jiang erhümi khümshüm benkacho. Ekhümkhi nlio ji tsükona, ontena kiroena khümshümtakhita vancho, yuta ekyongo lo jo Chicham Ovung empoe kina sokabenka elhi jo Chichamo na tsocho.

Wokha station lo Khristain ovungo jiang-
i) Chichamo Ovung ompoe

ii) Mhonlumo Kikon ompoe,

iii) Hankhoro

iv) Dhon Maya

v) Nthunglo

vi) Jatman puri

vii) Tssolo Ezung

Nzyu 1919 lo Ekhümki ovüngo  (16′ x 12′) lishü ki enhünga police point na engchirolamoe jilo tsoe khitacho. Khristian jiang na heto nrüronta vanathung, Dr. Sevilie Angami ompoe na Wokhalo yicho osi Ekhümkho ji nzana sheküpcho. Esopvüi nvamo jina Chichamo na sayata vancho.

Nzyu 1920-31 nandang jo Khristian okho teriv onte bobo nrünronta soka benkatacho.

Nzyu 1932 lo jo Chumdemo Murry tona Tsayio Kikon to oni na laphya m-mok khia Vankhosüngina chongta rhoro Ekhümkho shi nzanchicho.

Nzyu 1934 lo loroe tsükana efürama benphicho ntana hoji omying süyiv jilona okho ji oyi n-myantacho yakchia khosotae nyinyang rheyicho. Rev. B. I. Anderson na Kohima vani kyon/Lotha Ekhümkho sayata vancho, hoji tsükona mbona olanlyui nsüngsochiv ekhyo tsocho khatola nsüngcheo ji tsükona Ekhümkho ejü eli jo Tsüngiki Ekhümkho khelo theyicho. Tolia Khristian jiang na Khümshümjo esani nsina randanta vancho, hoji tsükona elani nzyu tsük jilo Ekhümkho ji khikalancho.

Nzyu 1935-42 yutalo Khristian wopan shiang ekhyimpha lancho osi Ekhümkho woro rankata yicho-
i) Merithung Mozhui ompo, ii) Chonkhurhomo Lotha ompoe, iii) Tsansow Hon. Magistrate MBE, iv) Phyolumo Khuvung, v) Lochamo Ezung,vi) Fujamo Mozhui, vii) Chothungo Ezung

Nzyu 1943-44 jana Pastor ji shikato ndongkae nvao ji tsükona Ekhümkho worona chongta soka-benkata vancho. Heto shina jo ochüm nche osi tssojan phyojan ha nli to etsowo jina nzyu 1945 lona benkae Pastor vantoktav to methaktacho.

Nzyu 1944 lo jo esaeden ovüngo to shiang ethüngchecho osi shiang na Ekhümkho ji sataronta soka-benkata rocho-
i) Chumdemo Murry, ii) Tsayio Kikon, iii) Lilamo Patton, iv) Merithung Mozhui, v) Lojamo Ezung, Lisae

Nzyu 1944 lo Vankhosüng khaphen ji dongphi Wokha station ni rheyio ji yakchia püngnoe wopan jiang ekhyimphae Ekhümkho woro rankacho, shi yakchia Ekhümki ethan etsowo sükhying tsocho, hoji tsükona kimüng ji eseni enhünga SBI Office ndungo phongtongro jilo lishüki 35’x 24’ tsotacho. Shijo Tsansow na Hon. Magistrate tsoathüng ombo nlansüng eyo-erong yakchia tsocho. Yuta shi Ekhümkho ji mhona nsoyingchev vanathüng odon lia Dr. Sevilie Angami ompoe na Wokhae yilani elümoto mepvüdongpvüa sayata vancho. Kvüthungsanajo ompoe taena mpi khümta rocho.